Connect with us

India

Analysis: മോദി സർക്കാരിന്റെ ജൻ ധൻ യോജന ലക്ഷ്യം കണ്ടോ?

പ്രധാനമന്ത്രിയുടെ ആശയം പുതിയതല്ല. 2005ൽ റിസർവ് ബാങ്ക് ഓഫ് ഇന്ത്യ ‘നോ-ഫ്രിൽസ്’ അക്കൗണ്ടുകൾ അവതരിപ്പിച്ചിരുന്നു

Published

on

2014ൽ  ചെങ്കോട്ടയിൽ നടന്ന പ്രധാനമന്ത്രി നരേന്ദ്ര മോഡിയുടെ  ആദ്യ സ്വാതന്ത്ര്യദിന പ്രസംഗത്തിലാണ്, ജൻധൻ യോജന പ്രഖ്യാപിക്കുന്നത്. സീറോ ബാലൻസ് അക്കൗണ്ടിലൂടെ പാവപ്പെട്ട ആളുകളെ  ബാങ്കിങ് സേവനങ്ങൾ  ഉപയോഗിക്കാൻ പ്രാപ്തരാക്കുകയും അവരുടെ സാമ്പത്തിക ആവശ്യങ്ങൾ പരിഹരിക്കപ്പെടുകയും  അതുവഴി ഇന്ത്യയുടെ കാർഷിക-വ്യവസായ മേഖലകൾ  മെച്ചപ്പെടുത്തുകയും ചെയ്യുക എന്നതാണ്  ലക്‌ഷ്യമെന്നും  പറയുകയുണ്ടായി.

പ്രധാനമന്ത്രിയുടെ ആശയം പക്ഷേ പുതുമയുള്ളതായിരുന്നില്ല. 2005 ലാണ് റിസർവ് ബാങ്ക് ഓഫ് ഇന്ത്യ ‘നോ-ഫ്രിൽസ്’ അക്കൗണ്ടുകൾ അവതരിപ്പിക്കുന്നത്. 2012 മുതൽ  “അടിസ്ഥാന സേവിങ്സ് അക്കൗണ്ടുകൾ” എന്ന് പേരിലാണ് അവ അറിയപ്പെടാൻ തുടങ്ങിയത്. കാര്യമായ എഴുത്തുകുത്തുകളുടെ  ആവശ്യമില്ലാതെ തുടങ്ങാനാകുന്ന ഈ അക്കൗണ്ടുകൾക്ക്, സാധാരണ സേവിങ്സ് അക്കൗണ്ട് പോലെ കുറഞ്ഞ ബാലൻസ് വേണമെന്ന നിർബന്ധമില്ലായിരുന്നു.

ഇത്തരം അക്കൗണ്ടുകളുടെ ജനകീയതയും ലഭ്യതയും വർധിപ്പിക്കുക എന്നതാണ് ജൻധൻ അക്കൗണ്ടുകൾ അവതരിപ്പിച്ചതിലൂടെ നടന്നത്. സംസ്ഥാന സർക്കാരുകളെ ലക്ഷ്യമിട്ട് തുടങ്ങിയ പദ്ധതി, പലപ്പോഴും ഉപഭോക്താവിന്റെ ഔപചാരികമായ സമ്മതമില്ലാതെ അക്കൗണ്ടുകൾ തുറക്കുന്ന സ്ഥിതിയിലുമെത്തി. 2 ലക്ഷത്തിന്റെ ലൈഫ് ഇൻഷുറൻസ് പോളിസി ആയിരുന്നു ഈ അക്കൗണ്ടുകളുടെ മറ്റൊരു പ്രത്യേകത. വർഷം 330 രൂപയായിരുന്നു പ്രീമിയം. വർഷം 12 രൂപ പ്രീമിയത്തിൽ 1 ലക്ഷം വരെ ആക്സിഡന്റ് പരിരക്ഷയും ഇതിൽ ലഭ്യമായിരുന്നു. പിന്നീട് അത് 2 ലക്ഷമാക്കി ഉയർത്തി.

ആദ്യ വർഷം അക്കൗണ്ടുകളുടെ എന്നതിൽ വൻ കുതിച്ചു കയറ്റമായിരുന്നു. പക്ഷെ 53% അക്കൗണ്ടുകളും മാർച്ച് 2015 വരെ കാലിയായിരുന്നു. അതിനു ശേഷം അക്കൗണ്ടുകളുടെ വളർച്ചയിൽ  ഇടിവ് സംഭവിക്കാൻ തുടങ്ങുകയും  നിക്ഷേപ സംബന്ധമായ വിവരങ്ങൾ നൽകുന്നത് സർക്കാർ നിർത്തുകയും ചെയ്തു.

2108 സെപ്റ്റംബറിൽ, ജൻധൻ അക്കൗണ്ടുകൾ വൻ വിജയമായെന്ന് ധനകാര്യ മന്ത്രി അരുൺ ജെയ്റ്റ്‌ലി പ്രസ്താവിക്കുകയുണ്ടായി. എന്നാൽ, ജൻധൻ അക്കൗണ്ടുകളിലൂടെ സർക്കാർ ലക്ഷ്യമാക്കിയ വികസനം സാധ്യമായോ എന്ന ചോദ്യം പല വിദഗ്ധരും ഉന്നയിക്കുകയുണ്ടായി. പ്രത്യേകിച്ചും, ഗ്രാമീണ മേഖലയിലുള്ളവരുടെ സാമ്പത്തിക ആവശ്യങ്ങൾ പരിഹരിക്കാനും അവരുടെ തൊഴിൽ വികസനം സാധ്യമാക്കാനും ജൻധൻ അക്കൗണ്ടുകൾ കൊണ്ട് സാധിച്ചില്ലെന്ന വിമർശനം ഉയർന്നു.

ജൻധൻ പദ്ധതിക്കു കീഴിൽ അക്കൗണ്ടുകളുടെ എണ്ണം വർധിച്ചോ? 

2011-12 സാമ്പത്തിക വർഷം വരെയുള്ള കാലയളവിൽ, അടിസ്ഥാന സേവിങ്സ് അക്കൗണ്ടുകളുടെ എണ്ണത്തിൽ എല്ലാ വർഷവും 30% വളർച്ചാനിരക്കായിരുന്നു രേഖപ്പെടുത്തിയിരുന്നത്. 2014 ലെ ജൻധൻ യോജനയുടെ പ്രഖ്യാപനമുണ്ടായതോടെ ആ നിരക്കിൽ വൻ കുതിപ്പ് രേഖപ്പെടുത്തി. 63% വളർച്ചാ നിരക്ക് അക്കൗണ്ടുകളുടെ എണ്ണത്തിലുണ്ടായി. ആദ്യ കുതിപ്പിന് ശേഷം അക്കൗണ്ടുകളുടെ എണ്ണം വർദ്ധിക്കുന്നതിൽ ഗണ്യമായ ഇടിവ് സംഭവിക്കാൻ തുടങ്ങി. 2017-18 സാമ്പത്തിക വർഷം കഷ്ടിച്ച് 0.6% നിരക്കിലുള്ള വർധനവാണ് അക്കൗണ്ടുകളുടെ എണ്ണത്തിലുണ്ടായത്.


ജൻധൻ യോജനയ്ക്കു കീഴിൽ ബാങ്ക് നിക്ഷേപങ്ങളിൽ വർദ്ധനവുണ്ടായോ?

ആദ്യ വർഷം, ബാങ്കിടപാടുകളുടെ എണ്ണത്തിൽ 70% വളർച്ചാനിരക്ക് രേഖപ്പെടുത്തി. അക്കൗണ്ടുകളുടെ എണ്ണത്തിലുണ്ടായ 63% വർദ്ധനവിന് ആനുപാതികമായിട്ടായിരുന്നു ഇത്.

പക്ഷേ, 2016-17 സാമ്പത്തിക വർഷം മുതൽ  ഗ്രാഫിൽ വൈരുധ്യങ്ങൾ പ്രകടമായി തുടങ്ങി.  അക്കൗണ്ടുകളുടെ  എണ്ണത്തിലുള്ള  വർധനവ് 13% ആയി കുറയുമ്പോൾ, ഇടപാടുകളുടെ എണ്ണത്തിൽ  53% വർദ്ധനവ് രേഖപ്പെടുത്തി. രണ്ടു കണക്കുകളും തമ്മിലുള്ള അനുപാതത്തിൽ പ്രകടമായ വൈരുധ്യം ദൃശ്യമാണ്.

ഫെബ്രുവരി 2017 ൽ ലോക്സഭയിൽ ഉന്നയിക്കപ്പെട്ട ചോദ്യങ്ങളിലെ വിവരങ്ങൾ പ്രകാരം, 2016 നവംബർ 9 മുതൽ 2017 ജനുവരി 5 വരെയാണ് നിക്ഷേപങ്ങളിലെ വർദ്ധനവ് ഏറ്റവും കൂടുതൽ രേഖപ്പെടുത്തിയിക്കുന്നത്. 2016 നവംബർ 8 നാൻ 86% കറൻസികളും മോദി സർക്കാർ നിർത്തലാക്കുന്നത്. 21000 കോടി രൂപയാണ് 85 ദിവസങ്ങൾക്കുള്ളിൽ ജൻധൻ അക്കൗണ്ടുകളിൽ നിക്ഷേപം നടന്നത്.

ഈ നിക്ഷേപങ്ങൾ സംശയകരമാണെന്ന ആക്ഷേപങ്ങൾ ഉയർന്നു. 3.7 കോടി ജൻധൻ അക്കൗണ്ടുകളിലായി നടന്ന നിക്ഷേപങ്ങൾ റിസർവ് ബാങ്ക് ഓഫ് ഇന്ത്യ എണ്ണിത്തിട്ടപ്പെടുത്തുമെന്ന് അതെ വർഷം സെപ്റ്റംബറിൽ “ബിസിനസ് സ്റ്റാൻഡേർഡ്” റിപ്പോർട്ട് ചെയ്തിരുന്നു.

 വിവരകാവകാശ നിയമ പ്രകാരം, 16 ബാങ്കുകളിൽ നിന്ന് ശേഖരിച്ച വിവരങ്ങളിൽ നിന്ന് ഈ നിക്ഷേപം മുഴുവൻ കള്ളപ്പണം വെളുപ്പിക്കാനായി ഉപയോഗിക്കപ്പെട്ടതാണെന്ന് “മണി ലൈഫ്” റിപ്പോർട്ട് ചെയ്തു. യൂണിയൻ ബാങ്ക് ഓഫ് ഇന്ത്യയിലെ ഒരു ജൻധൻ അക്കൗണ്ടിൽ 93. 82 കോടി രൂപയുള്ളതായും ഇന്ത്യൻ ബാങ്കിൽ ഒറ്റ ഇടപാടിൽ 3.05 കോടിയുടെ നിക്ഷേപം നടന്നതായും കണ്ടെത്തിയിരുന്നു. 20 ലക്ഷം അക്കൗണ്ടുകളിൽ 1 ലക്ഷത്തിലധികം രൂപയുടെ നിക്ഷേപം കണ്ടെത്തി.

ഈ അക്കൗണ്ടുകൾ സജീവമായി ഉപയോഗപ്പെടുത്തിയോ?

ജൻധൻ യോജന പ്രഖ്യാപിച്ച് ഒരു മാസത്തിനുള്ളിൽ, സെപ്റ്റംബർ 2014 ൽ 76.81 % അക്കൗണ്ടുകളും സീറോ ബാലൻസ് ആയിരുന്നു. മാർച്ച് 2015 ഓടെ ഇത് 53% ആയി കുറഞ്ഞു.

സെപ്തംബർ 2016 ൽ 30 ദേശസാൽകൃത ബാങ്കുകളിലെ മാനേജർമാർ 1 രൂപ വീതം 1.05 അക്കൗണ്ടുകളിലായി നിക്ഷേപിക്കുകയുണ്ടായി. സീറോ ബാലൻസ് അക്കൗണ്ടുകളുടെ എണ്ണം കുറയ്ക്കാനായി മാനേജർമാർ കടുത്ത സമ്മർദ്ദത്തിലായിരുന്നു എന്ന്  ഇന്ത്യൻ എക്സ്പ്രസ്, മിന്റ് തുടങ്ങിയ പത്രങ്ങൾ റിപ്പോർട്ട് ചെയ്തിരുന്നു.

ഒരു വർഷത്തിന് ശേഷം, സീറോ ബാലൻസുള്ള ജൻധൻ അക്കൗണ്ടുകളുമായി ബന്ധപ്പെട്ട എല്ലാ വിവരങ്ങളും പദ്ധതിയുടെ വെബ്‌സൈറ്റിൽ നിന്ന് നീക്കം ചെയ്തു.

സീറോ ബാലൻസ് അക്കൗണ്ടുകളുടെ എണ്ണം കുറഞ്ഞുവെന്ന് അവകാശപ്പെടുമ്പോഴും അവയെ കുറിച്ചുള്ള ചോദ്യങ്ങൾക്ക്,സീറോ ബാലൻസ് അക്കൗണ്ടുകൾ ട്രാക്ക് ചെയ്യുന്നതിൽ അർത്ഥമില്ല എന്ന മറുപടിയാണ് സർക്കാർ പറഞ്ഞത്.

“ജൻധൻ അക്കൗണ്ടുകളിലെ  ഇടപാടുകളുടെ സ്വഭാവം അനുസരിച്ച് ദിനം പ്രതിയുള്ള ബാലൻസിൽ വ്യത്യാസം വരാം. ചിലപ്പോൾ ചില ദിവസങ്ങളിൽ അത് സീറോ ബാലൻസ് ആയെന്നിരിക്കും.” കഴിഞ്ഞ വർഷം മാർച്ചിലും ഓഗസ്റ്റിലും ഇതേ സംബന്ധിച്ച് ലോക്സഭയിലുയർന്ന ചോദ്യങ്ങൾക്ക് മന്ത്രാലയം മറുപടി പറഞ്ഞതിങ്ങനെയാണ്.

വിവരങ്ങൾ: ധനകാര്യ മന്ത്രാലയം

അഴിമതി ഇല്ലാതാക്കാൻ ഗവൺമെന്റിന് സാധിച്ചോ?

സർക്കാർ ക്ഷേമനിധികളുടെ വിനിയോഗം ഇടപാടുകാരിലൂടെ അല്ലാതെ, ഇടപാടുകാരിലേക്ക് നേരിട്ട് എത്തിക്കാൻ അക്കൗണ്ടുകൾ സഹായിക്കും എന്നായിരുന്നു ഗവണ്മെന്റിന്റെ കണക്കുകൂട്ടൽ. കഴിഞ്ഞ അഞ്ചു വർഷങ്ങളിൽ, ഗവണ്മെന്റ് നേരിട്ട് നടത്തിയ ഇടപാടുകളിൽ 388% വർദ്ധനവ് ഉണ്ടായതായി മന്ത്രാലയം അവകാശപ്പെടുന്നുമുണ്ട്. പക്ഷെ, ആധാർ കാർഡ് ലിങ്ക് ചെയ്യാനുള്ള നീക്കം കൂടുതൽ പ്രശ്നങ്ങളുണ്ടാക്കി എന്നുവേണം മനസിലാക്കാൻ. അക്കൗണ്ടുകൾ പരസ്പരം മാറി  തെറ്റായ അക്കൗണ്ടുകളിലേക്ക് പണം നിക്ഷേപിക്കപ്പെട്ടു. മാത്രമല്ല, ജൻധൻ അക്കൗണ്ടുകളുടെ സ്വഭാവം പണം പിൻവലിക്കാൻ ഉപഭോക്താവിന് ബുദ്ധിമുട്ടുണ്ടാക്കി. 10000 രൂപയിൽ കുറഞ്ഞ 4 ഇടപാടുകൾ മാത്രമാണ് ജൻധൻ അക്കൗണ്ടുകൾക്ക് ഒരു മാസം അനുവദിക്കപ്പെട്ടിരിക്കുന്നത്. പ്രധാൻമന്ത്രി ആവാസ് യോജന പോലുള്ള സ്കീമുകളിൽ ലഭ്യമായ 1.2 ലക്ഷം സബ്‌സിഡി ലഭിക്കാൻ, ഉപഭോക്താവിന് ഒട്ടേറെ തവണ ബാങ്ക് സന്ദർശിക്കേണ്ടതായി വരുന്നു.

കൂടിയ നിക്ഷേപ സംഖ്യ 50000 രൂപയായതും തലവേദന സൃഷ്ടിക്കുന്നുണ്ട്. നേരത്തെ ഇത് 1 ലക്ഷം രൂപയായിരുന്നു. ഇപ്പോൾ, 50000 രൂപയ്ക്കു മുകളിലുള്ള അക്കൗണ്ടുകൾ മരവിപ്പിക്കപ്പെടും.  പ്രധാൻ മന്ത്രി ആവാസ് യോജന പ്രകാരമുള്ള ഗഡുക്കൾ ഒരു തവണ എത്തിയാൽ തന്നെ അക്കൗണ്ടുകൾ മരവിപ്പിക്കപ്പെടുന്നു എന്നതും ജൻധൻ അക്കൗണ്ടുകൾ ഉപയോഗപ്പെടുത്താൻ തടസം സൃഷ്ടിക്കുന്നു. ഗവണ്മെന്റിന്റെ ക്ഷേമ നിധി പ്രകാരമുള്ള തുകകൾ ഒരുമിച്ച്  അക്കൗണ്ടിൽ എത്തുന്നതും പ്രശ്നം സൃഷ്ടിക്കുന്നുണ്ട്.

ലക്ഷ്യം നടപ്പാക്കാൻ പദ്ധതിക്ക് കഴിഞ്ഞോ? 

2014 മുതൽ ഗ്രാമീണ മേഖലയിലെ സാമ്പത്തിക ആവശ്യങ്ങൾ പൂർത്തീകരിക്കുന്നതിന് സ്തംഭനം നേരിട്ടതായി അംബേദ്‌കർ യൂണിവേഴ്സിറ്റിയിലെ ജെ.എൻ.യുവിലും നടത്തിയ പഠനങ്ങളിൽ തെളിഞ്ഞിരുന്നു. കഴിഞ്ഞ സാമ്പത്തിക വർഷം നബാർഡ് നടത്തിയ സർവ്വേ പ്രകാരം, ഗ്രാമീണ മേഖലയിൽ അടിസ്ഥാന സാമ്പത്തിക ഇടപാടുകളിൽ പരിജ്ഞാനമുള്ളവർ 40% ആണെങ്കിലും ലോണുകൾ ആവശ്യമുള്ളവരിൽ 29% മാത്രമാണ് ബാങ്കുകളെ സമീപിച്ചത്. മോഡി ഗവണ്മെന്റ് അധികാരത്തിൽ വന്നതിനു ശേഷം, ചെറുകിട വായ്പയെടുക്കുന്നവരുടെ എണ്ണം ഗണ്യമായി കുറഞ്ഞുവെന്നാണ് റിപ്പോർട്ടുകൾ സൂചിപ്പിക്കുന്നത്.

courtsey:www.scroll.in

Continue Reading
Click to comment

Leave a Reply

Your email address will not be published. Required fields are marked *

India

‘ചാണക ചിപ്പ്’ റേഡിയേഷന്‍ കുറക്കുമോ? കേന്ദ്ര സർക്കാർ പറയുന്നത് ഇങ്ങനെ

പശുവിന്റെ ചാണകം ഉപയോഗിച്ച് നിര്‍മിച്ച ചിപ്പ് മൊബൈല്‍ റേഡിയേഷന്‍ ഗണ്യമായി കുറക്കുമെന്ന് രാഷ്ട്രീയ കാമധേനു ആയോഗ് ചെയര്‍മാന്‍ വല്ലഭ്ഭായ് കഥിരിയ അവകാശപ്പെട്ടു

Published

on

ന്യൂദല്‍ഹി: മൊബൈല്‍ ഹാന്‍ഡ്‌സെറ്റുകളില്‍ നിന്നുള്ള റേഡിയേഷന്‍ കുറക്കാന്‍ സഹായിക്കുന്ന ‘ഗൗസത്വ കവച്’ എന്ന പേരിലുള്ള പ്രത്യേക ചിപ്പ് കേന്ദ്ര മൃഗസംരക്ഷണ മന്ത്രാലയത്തിനു കീഴിലുള്ള രാഷ്ട്രീയ കാമധേനു ആയോഗ് അവതരിപ്പിച്ചു.  ഈ ചിപ് പശുവിന്റെ ചാണകം ഉപയോഗിച്ചാണ് നിര്‍മിച്ചിരിക്കുന്നത്. ഇത് മൊബൈല്‍ റേഡിയേഷന്‍ ഗണ്യമായി കുറക്കുമെന്ന് രാഷ്ട്രീയ കാമധേനു ആയോഗ് ചെയര്‍മാന്‍ വല്ലഭ്ഭായ് കഥിരിയ അവകാശപ്പെട്ടു.  ‘ഇത് മൊബൈലില്‍ സൂക്ഷിക്കാവുന്ന ഒരു റേഡിയേഷന്‍ ചിപ് ആണ്. ഇത് റേഡിയേഷന്‍ ഗണ്യമായി കുറക്കുന്നത് ഞങ്ങള്‍ കണ്ടിട്ടുണ്ട്. നിങ്ങള്‍ക്ക് രോഗങ്ങളെ മാറ്റിനിര്‍ത്തണമെങ്കില്‍ ഈ ചിപ്പ് ഉപയോഗിക്കാം,’ അദ്ദേഹം പറഞ്ഞു. പശുവിന്‍ ചാണകം റേഡിയേഷന്‍ പ്രതിരോധകമാണ്. ഈ ചിപ്പ് വീട്ടില്‍ സൂക്ഷിച്ചാല്‍ അവിടെയും റേഡിയേഷന്‍ മുക്തമാകുമെന്നും ഇതെല്ലാം ശാസ്ത്രം അംഗീകരിച്ചതാണെന്നും അദ്ദേഹം അവകാശപ്പെട്ടു. രാജ്‌കോട്ടിലെ ശ്രിജീ ഗോശാലയാണ് ഈ ചിപ്പ് നിര്‍മ്മിച്ചിരിക്കുന്നത്.

Continue Reading

India

ഇന്ത്യയുടെ സാമ്പത്തിക വളര്‍ച്ചയില്‍ ചരിത്രത്തിലെ ഏറ്റവും വലിയ ഇടിവ് 

ജിഡിപി വളര്‍ച്ചാ നിരക്കില്‍ 23.9 ശതമാനം കുത്തനെ ഇടിവ് രേഖപ്പെടുത്തി. ഏപ്രില്‍-ജൂണ്‍ ത്രൈമാസ കാലയളവിലാണിത്

Published

on

ന്യൂദല്‍ഹി: 2020-21 സാമ്പത്തിക വര്‍ഷം ആദ്യ പാദത്തിലെ രാജ്യത്തിന്റെ സാമ്പത്തിക വളര്‍ച്ചാ നിരക്കുകള്‍ പ്രസിദ്ധീകരിച്ചു. ആഭ്യന്തര മൊത്ത ഉല്‍പ്പന്ന(ജിഡിപി) വളര്‍ച്ചാ നിരക്കില്‍ 23.9 ശതമാനം കുത്തനെ ഇടിവ് രേഖപ്പെടുത്തി. ഏപ്രില്‍-ജൂണ്‍ ത്രൈമാസ കാലയളവിലാണിത്. മുന്‍ സാമ്പത്തിക വര്‍ഷം ഇതേപാദത്തില്‍ ജിഡിപി 5.2 ശതമാനം വളര്‍ച്ച രേഖപ്പെടുത്തിയിരുന്നു. ഇന്ത്യന്‍ സമ്പദ്ഘടനയുടെ ചരിത്രത്തിലെ ഏറ്റവം മോശം പ്രകടനമാണിത്. കോവിഡ് വ്യാപനത്തെ തുടര്‍ന്ന് മാര്‍ച്ച് 25 മുതല്‍ കേന്ദ്ര സര്‍ക്കാര്‍ ലോക്ഡൗണ്‍ നടപ്പിലാക്കിയതിനാല്‍ ഉല്‍പ്പാദന മേഖലയും സേവനമേഖലയും പൂര്‍ണമായും നിശ്ചലമായതാണ് സാമ്പത്തിക രംഗത്ത് വലിയ പ്രത്യാഘാതമുണ്ടാക്കിയത്.

തൊട്ടു മുമ്പത്തെ പാദത്തില്‍ 3.1 ശതമാനം വളര്‍ച്ച രേഖപ്പെടുത്തിയിരുന്നു. ഇതാണ് മൂന്നു മാസത്തിനിടെ 23.9 ശതമാനമായി കൂപ്പുകുത്തിയതെന്ന് കേന്ദ്ര സ്റ്റാറ്റിസ്റ്റിക്‌സ് മന്ത്രാലയം പ്രസിദ്ധീകരിച്ച സാമ്പത്തിക ഫലം വ്യക്തമാക്കുന്നു. ഇതു പ്രതീക്ഷിതച്ചതായിരുന്നു. സാമ്പത്തിക വിദഗ്ധരും വിവിധ ഏജന്‍സികളും വളര്‍ച്ചാ നിരക്കില്‍ 16.5 ശതമാനം മുതല്‍ 18 ശതമാനം വരെ ഇടിവുണ്ടാകുമെന്ന് നേരത്തെ പ്രവചിച്ചിരുന്നു. നാഷണല്‍ സ്റ്റാറ്റിസ്റ്റിക്കല്‍ ഓര്‍ഗനൈസേഷന്റെ കണക്കു പ്രകരാം കാര്‍ഷിക മേഖല ഒഴികെ മറ്റെല്ലാ പ്രധാന മേഖലകളിലും വളര്‍ച്ചാ ഇടിവ് ഉണ്ടായി. നിര്‍മാണ മേഖലയില്‍ 50.3 ശതമാനമാണ് ഇടിവ്. ഉല്‍പ്പാദന രംഗത്ത് 39.3 ശതമാനവും. ഇലക്ട്രിസിറ്റി, ഗ്യാസ്, കുടിവെള്ളം തുടങ്ങി അവശ്യ സേവന മേഖലകളില്‍ ഏഴു ശതമാനവും വ്യാപാരം, ഹോട്ടല്‍, ഗതാഗതം, കമ്യൂണിക്കേഷന്‍ രംഗത്ത് 47 ശതമാവും വളര്‍ച്ച ഇടിഞ്ഞു.

Continue Reading

India

ബിജെപിക്ക് തുറന്ന പിന്തുണ; മോഡിയുടെ ജയത്തിനും സഹായിച്ചുവെന്ന് വിവാദ ഫേസ്ബുക്ക് ഉദ്യോഗസ്ഥ

Published

on

ന്യൂദല്‍ഹി: ബിജെപി നേതാക്കളുടെ വിദ്വേഷ, വര്‍ഗീയ പോസ്റ്റുകള്‍ ഫേസ്ബുക്കില്‍ നിന്നും നീക്കം ചെയ്യുന്നത് തടഞ്ഞ് വിവാദത്തിലായ ഇന്ത്യയിലെ ഫേസ്ബുക്ക് പബ്ലിക് പോളിസി ഡയറക്ടര്‍ അംഘി ദാസിനെതിരെ ഗുരുതര വെളിപ്പെടുത്തലുമായി അമേരിക്കന്‍ പത്രമായ വോള്‍ സ്ട്രീറ്റ് ജേണല്‍ വീണ്ടും. വര്‍ഷങ്ങളായി ഫേസ്ബുക്ക് ജീവനക്കാരുടെ ഗ്രൂപ്പില്‍ അംഘി ദാസ് ബിജെപിയെ പിന്തുണച്ച് മെസേജുകള്‍ ഇടാറുണ്ടെന്നും 2014ലെ ദേശീയ തെരഞ്ഞെുപ്പില്‍ ബിജെപിയും നരേന്ദ്ര മോഡിയും ജയിച്ചതിനു പിന്നിലെ ഫേസ്ബുക്കിന്റെ സഹായത്തെ കുറിച്ച് പറഞ്ഞിരുന്നതായി വോള്‍ സ്ട്രീറ്റ് ജേണലിന്റെ പുതിയ റിപോര്‍ട്ടില്‍ പറയുന്നു. വിദ്വേഷ പ്രചരണം തടയുന്നതിനുള്ള ഫേസ്ബുക്കിന്റെ നയത്തിനും ചടങ്ങള്‍ക്കും വിരുദ്ധമായി ബിജെപി നേതാക്കളുടെ ഇത്തരം പോസ്റ്റുകള്‍ പ്രചരിപ്പിക്കാന്‍ പ്രോത്സാഹിപ്പിച്ച അംഘി ദാസിനെതിരായ പ്രതിഷേധം തണുക്കും മുമ്പാണ കൂടുതല്‍ ഗൗരവമേറിയ പുതിയ വെളിപ്പെടുത്തല്‍.

നിരവധി ഫേസ്ബുക്ക് ജീവനക്കാര്‍ അംഗങ്ങളായ ഗ്രൂപ്പില്‍ 2012നും 2014നുമിടയിലാണ് അംഘി ദാസ് ബിജെപിയെ പിന്തുണച്ച് സ്ഥിരമായി മേസേജുകള്‍ പോസ്റ്റ് ചെയ്തിരുന്നതെന്ന് റിപോര്‍ട്ട് പറയുന്നു. കമ്പനിയുടെ ഇന്ത്യയിലെ ജവനക്കാര്‍ക്കു വേണ്ടിയുള്ളതായിരുന്നു ഈ ഗ്രൂപ്പെങ്കിലും മറ്റു രാജ്യങ്ങളിലെ ജീവനക്കാരും ഇതിലുണ്ടായിരുന്നു. മോഡി 2014ല്‍ വീണ്ടും ജയിച്ചപ്പോല്‍ ഈ ഗ്രൂപ്പില്‍ അംഘി ദാസ് പോസ്റ്റ് ചെയ്ത സന്ദേശം ‘അദ്ദേഹത്തിന്റെ സോഷ്യല്‍ മീഡിയാ കാമ്പയിന് നാമാണ് തിരികൊളുത്തിയത്. ബാക്കി ചരിത്രം’ എന്നായിരുന്നു. ‘ഒടുവില്‍ ഇന്ത്യെ സ്‌റ്റേറ്റ് സോഷ്യലിസത്തില്‍ നിന്നു മുക്തമാക്കാന്‍ 30 വര്‍ഷത്തെ അടിത്തട്ടിലുള്ള പ്രവര്‍ത്തനങ്ങള്‍ വേണ്ടി വന്നു’ എന്നായിരുന്നു കോണ്‍ഗ്രസിന്റെ പരാജയത്തില്‍ സന്തോഷം പ്രകടിപ്പിച്ച് അംഘി ദാസിന്റെ മറ്റൊരു സന്ദേശമെന്നും വോള്‍ സ്ട്രീറ്റ് ജേണല്‍ പറയുന്നു. മോഡിക്കു വേണ്ടി നടത്തിയ പ്രചാരണത്തില്‍ ദീര്‍ഘകാല സഹായിയായി അംഘിദാസ് വിശേഷിപ്പിക്കുന്നത് ഫേസ്ബുക്കിലെ ആഗോള തെരഞ്ഞെടുപ്പു കാര്യ ഉദ്യോഗസ്ഥ കാറ്റീ ഹര്‍ബാത്തിനേയാണ്.

മുസ്‌ലിംകള്‍ തരംതാണ സമൂഹമാണെന്നും മതനിഷ്ഠയും ശരീഅ നടപ്പാക്കലും കഴിഞ്ഞു മാത്രമെ മറ്റെല്ലാമുള്ളൂവെന്നും തന്റെ ഫേസ്ബുക്കില്‍ അംഘി ദാസ് പോസ്റ്റിട്ടിരുന്നു. ഈ പോസ്റ്റിന്റെ പേരില്‍ അംഘി ദാസ് ഈയിടെ ഫേസ്ബുക്കിലെ മുസ്‌ലിം ജീവനക്കാരോട് മാപ്പപേക്ഷിച്ചതായി ബസ്ഫീഡ് ഈയിടെ റിപോര്‍ട്ട് ചെയ്തിരുന്നു. ഫേസ്ബുക്ക് ഇന്ത്യയില്‍ ഉള്ളടക്കം നിയന്ത്രിക്കുന്നതിനും വിദ്വേഷം തടയുന്നതിനും വേണ്ട മതിയായ നടപടിക്രമങ്ങള്‍ പാലിക്കപ്പെടുന്നുേേണ്ടാ എന്നു ചോദ്യം ചെയ്ത് നിരവധി ഫേസ്ബുക്ക് ജീവനക്കാര്‍ രംഗത്തു വന്നതായും റോയിട്ടേഴ്‌സ് റിപോര്‍ട്ട് ചെയ്തിരുന്നു.

അംഘി ദാസിനെതിരായ ആദ്യ വോള്‍ സ്ട്രീറ്റ് ജേണല്‍ റിപോര്‍ട്ട് പുറത്തു വന്നപ്പോള്‍ ഫേസ്ബുക്ക് തുറന്നതും സുതാര്യവും നിഷ്പക്ഷവുമാണെന്നായിരുന്നു കമ്പനിയുടെ ഇന്ത്യാ മേധാവി അജിത് മോഹന്റെ പ്രതികരണം. വിദ്വേഷ പ്രചരണത്തെ പിന്തണച്ചതു സംബന്ധിച്ച് അംഘി ദാസ് ഉള്‍പ്പെടെയുള്ള ഫേസ്ബുക്ക് ജീവനക്കാരുടെ വാദം ബുധനാഴ്ച പാര്‍ലമെന്റിന്റെ ഐടികാര്യ സമിതി കേള്‍ക്കാനിരിക്കുകയാണ്. കോണ്‍ഗ്രസ് എംപി ശശി തരൂരാണ് ഈ സമിതി ചെയര്‍മാന്‍. ഫേസ്ബുക്കിനോട് വിശദീകരണം തേടിയ തൂരരിന്റെ നടപടിക്കെതിരെ സമിതി അംഗങ്ങളായ ബിജെപി നേതാക്കളും രംഗത്തുവന്നിരുന്നു.

Continue Reading
Advertisement

Trending

Copyright © 2020 Nowit Media.