കെ വി എ ഖാദർ

കൊച്ചി ആസ്ഥാനമായ കേന്ദ്ര സര്‍ക്കാര്‍ സ്ഥാപനമായ കേന്ദ്ര സമുദ്രമത്സ്യ ഗവേഷണ സ്ഥാപനത്തിലാണ് (സിഎംഎഫ്ആര്‍ഐ) ശാസ്ത്രജ്ഞര്‍ മീനുകളുടെ പ്രായം തിട്ടപ്പെടുത്തുന്നതിനുള്ള ഗവേഷണപ്രവര്‍ത്തനങ്ങള്‍ നടത്തിവരുന്നത്. മീനുകളുടെ വലിപ്പം നോക്കി പ്രായം കണക്കാക്കുന്ന ഇതുവരെയുള്ള രീതിക്ക് ഇനി മാറ്റം വരും. മത്സ്യങ്ങളുടെ വളര്‍ച്ചാ നിരക്കും വലിപ്പവും പല ഘടകങ്ങളെ ആശ്രയിച്ചിരിക്കുന്നതിനാല്‍ വലിപ്പം നോക്കി മീനുകളുടെ വയസ്സ് കണക്കാക്കുന്നത് യുക്തിസഹമല്ലെന്ന തിരിച്ചറിവാണ് കൃത്യമായ പ്രായം കണ്ടെത്തുന്നതിലേക്ക് മത്സ്യശാസ്ത്രജ്ഞരെ നയിച്ചത്. ലോകത്ത് പല ഭാഗങ്ങളിലും ഇത്തരം പ്രായനിര്‍ണയ പരിശോധനകള്‍ നടന്നുവരുന്നുണ്ടെങ്കിലും സിഎംഎഫ്ആര്‍ഐയിലെ ലബോറട്ടറി ഇന്ത്യയില്‍ ആദ്യത്തേതാണ്.

മത്സ്യങ്ങളുടെ പ്രായനിര്‍ണയത്തിന് രണ്ട് പരീക്ഷണശാലകളാണ് സിഎംഎഫ്ആര്‍ഐയില്‍ പ്രവര്‍ത്തിക്കുന്നത്. എല്ലാതരം മീനുകളുടെയും പ്രായം തിട്ടപ്പെടുത്തുന്നതിന് ഒന്നും, കൂന്തല്‍ വര്‍ഗ്ഗങ്ങളുടേതിന് മറ്റൊരു ലബോറട്ടറിയുമാണ് സിഎംഎഫ്ആര്‍ഐയില്‍ ഉള്ളത്. പ്രിന്‍സിപ്പല്‍ സയന്റിസ്റ്റുമാരായ ഡോ ഇ എം അബ്ദുസ്സമദ്, ഡോ കെ സുനില്‍ മുഹമ്മദ് എന്നിവരുടെ നേതൃത്വത്തിലാണ് യഥാക്രമം ഇവ പ്രവര്‍ത്തിക്കുന്നത്. കൂടാതെ, ചെമ്മീന്‍ വര്‍ഗ്ഗങ്ങളുടെ പ്രായ പഠനത്തിന് മറ്റൊരു പരീക്ഷണശാലയും ആരംഭിക്കാനുള്ള ശ്രമങ്ങള്‍ നടന്നുവരുന്നുണ്ട്.

ചെവിക്കല്ലില്‍ എല്ലാമുണ്ട്
മരങ്ങളുടെ പ്രായം തിട്ടപ്പെടുത്തുന്ന രീതി പോലെ തന്നെ, മീനുകളിലും കട്ടികൂടിയ ഭാഗങ്ങളില്‍ കാണപ്പെടുന്ന വളര്‍ച്ചാ വളയങ്ങള്‍ (ഗ്രോത്ത് റിംഗ്സ്) പരിശോധിച്ചാണ് പ്രായം കണക്കാക്കുന്നത്. മീനുകളിലും കൂന്തലുകളിലും ചെവിക്കല്ലാണ് കൂടുതലായും ഇതിനായി ഉപയോഗിക്കുന്നത്. തലച്ചോറിന്റെ തൊട്ട് താഴെയാണ് ഇത് കാണുന്നത്. മീനുകളില്‍ ചെവിക്കല്ല് മൂന്ന് തരത്തിലുണ്ട്. അവയില്‍ വലിപ്പം കൂടിയ സജിറ്റ എന്ന ചെവിക്കല്ലാണ് വയസ്സ് നിര്‍ണയ പഠനത്തിന് സിഎംഎഫ്ആര്‍ഐ ഉപയോഗിക്കുന്നത്. പ്രായം കണ്ടെത്തുന്നതിന് മാത്രമല്ല, ജീവിതചക്രവുമായി ബന്ധപ്പെട്ട എല്ലാ വിവരങ്ങളും ചെവിക്കല്ലില്‍ രേഖപ്പെടുത്തിയിട്ടുണ്ട്. അത് കൊണ്ട് തന്നെ ബ്ലാക് ബോക്സ് എന്നാണ് ഇവയെ ശാസ്ത്ര സമൂഹം വിളിച്ചുവരുന്നത്. വളര്‍ച്ചാനിരക്ക് കൂടുന്നതിന്റെയും കുറയുന്നതിന്റെയും കാലയളവ് മീനുകളുടെയും കൂന്തലുകളുടെയും ചെവിക്കല്ല് നോക്കി മനസ്സിലാക്കാം. ശബ്ദം, മര്‍ദ്ദം മറ്റ് പാരിസ്ഥിതിക മാറ്റങ്ങള്‍ എന്നിവ മനസ്സിലാക്കുന്നത് ചെവിക്കല്ലിലൂടെയാണ്. മീനുകളുടെ ചലനങ്ങള്‍ സന്തുലിതമാക്കുന്നതും ചെവിക്കല്ലാണ്. ഇവയുടെ സഞ്ചാരപഥവുമായി ബന്ധപ്പെട്ട വിവരങ്ങള്‍ ചെവിക്കല്ല് പരിശോധിച്ച് മനസ്സിലാക്കുന്നതിനുള്ള ഗവേഷണങ്ങള്‍ ശാസ്ത്രജ്ഞര്‍ക്കിടയില്‍ പുരോഗമിക്കുന്നുണ്ട്. ചെവിക്കല്ലുകളുടെ വലിപ്പവും ഘടനയും മീനുകളുടെ ഇനങ്ങള്‍ക്കനുസരിച്ച് വ്യത്യാസപ്പെട്ടിരിക്കുമെന്ന് സിഎംഎഫ്ആര്‍ഐയിലെ മത്സ്യശാസ്ത്രജ്ഞര്‍ സാക്ഷ്യപ്പെടുത്തുന്നു.

മീനുകളുടെ വയസ്സ് കണ്ടെത്തുന്നത് എങ്ങനെ
ചെവിക്കല്ല് എടുത്ത ശേഷം സോണിക് ക്ലീനര്‍ ഉപയോഗിച്ച് നന്നായി വൃത്തിയാക്കി സിലിക്കണ്‍ റബ്ബര്‍ അച്ചുകളില്‍ പ്രത്യേക രീതിയില്‍ സ്ഥാപിക്കുന്നു. നാല് മണിക്കൂറിന് ശേഷം ചെവിക്കല്ലിലെ ന്യൂക്ലിയസിന്റെ ആദ്യഭാഗം തുടങ്ങുന്നിടം ഐസോക്കട്ട് ലോ സ്പീഡ് സോ എന്ന പ്രത്യേക യന്ത്രത്തില്‍ മുറിച്ചെടുക്കുന്നു. മുറിച്ചെടുത്ത ഭാഗം നന്നായി പോളിഷ് ചെയ്തെടുത്ത ശേഷം മൈക്രോസ്‌കോപ്പില്‍ വെച്ച് എത്ര വളയങ്ങളുണ്ടെന്ന് പരിശോധിക്കും. സാധാരണ കാഴ്ചയില്‍ നിന്നും ആയിരം മടങ്ങ് വലുതാക്കിയാണ് സൂക്ഷ്മദര്‍ശിനിയിലൂടെ ഇത് പരിശോധിക്കുന്നത്. ഒരു വളയം ഒരു ദിവസമാണ് സൂചിപ്പിക്കുന്നത്. 365 വളയങ്ങളുണ്ടെങ്കില്‍ മീനിന്റെ പ്രായം 1 വയസ്സ്. ഓരോ ദിവസത്തെയും വളര്‍ച്ചയുടെ അടിസ്ഥാനത്തിലാണ് മീനുകളില്‍ വളയങ്ങള്‍ രൂപപ്പെടുന്നത്. ഒരേ വലിപ്പത്തിലുള്ള മീനുകളില്‍ തന്നെ കൂടുതല്‍ വളയങ്ങളുള്ളതിന് വളര്‍ച്ചാ നിരക്ക് കുറവും കുറഞ്ഞ വളയങ്ങള്‍ കാണപ്പെടുന്ന മീനുകള്‍ക്ക് വളര്‍ച്ചാ നിരക്ക് കൂടുതലുമാണ്.

ഒമാന്‍ ചാളക്ക് ഉയര്‍ന്ന വളര്‍ച്ചാനിരക്ക്
മീനുകളുടെ വാസസ്ഥലം മാറുന്നതിനനുസരിച്ച് വളര്‍ച്ചയിലും മാറ്റമുണ്ടാകുമെന്നാണ് പ്രായനിര്‍ണയത്തിലടെ മനസ്സിലാകുന്നതെന്ന് സിഎംഎഫ്ആര്‍ഐയിലെ ശാസ്ത്രജ്ഞര്‍ ചൂണ്ടിക്കാട്ടുന്നു. കാലാവസ്ഥയിലെയും ഭക്ഷണലഭ്യതയിലെ ഏറ്റക്കുറച്ചിലുമാവാം ഇതിന് കാരണം. ഉദാഹരണത്തിന് ഒരേ വലിപ്പത്തിലുള്ള ഒമാന്‍ ചാളയുടെയും കേരള തീരങ്ങളില്‍ നിന്ന് പിടിക്കുന്ന ചാളയുടെയും പ്രായം പരിശോധിച്ചപ്പോള്‍ ഒമാന്‍ ചാളയില്‍ കുറഞ്ഞ വളയങ്ങള്‍ മാത്രമാണ് കണ്ടെത്തിയത്. അതായത്, ഒമാന്‍ ചാള കേരള തീരങ്ങളിലെ മത്തിയേക്കാള്‍ കുറഞ്ഞ സമയത്തിനുള്ളില്‍ തന്നെ കൂടുതല്‍ വളര്‍ച്ച നേടുന്നു. മീനുകളുടെ വാസസ്ഥലത്തിന് വളര്‍ച്ചയില്‍ കാര്യമായ സ്വാധീനമുണ്ടെന്നാണ് ഇത് വെളിപ്പെടുത്തുന്നത്. ഏകദേശം 8-9 മാസങ്ങള്‍ കൊണ്ട് ഒമാന്‍ ചാള 23-25 സെന്റി മീറ്റര്‍ വലിപ്പം കൈവരിച്ചപ്പോള്‍ കേരള തീരത്തില്‍ നിന്ന് ലഭിച്ച മത്തിക്ക് 17-20 സെ.മീ വലിപ്പം മാത്രമാണ് ലഭിച്ചത്. (ഒമാന്‍ ചാളക്ക് 110 മുതല്‍ 140 ഗ്രാം വരെ തൂക്കം വന്നപ്പോള്‍ കേരള മത്തിക്ക് 40 മുതല്‍ 70 ഗ്രാം വരെ മാത്രമാണ് തൂക്കമുണ്ടായിരുന്നത്.)

സിഎംഎഫ്ആര്‍ഐയുടെ പ്രായനിര്‍ണയ പരീക്ഷണം വിജയകരമാണോ എന്ന് പരിശോധിക്കുന്നതിന് വേണ്ടി, സിഎംഎഫ്ആര്‍ഐയില്‍ തന്നെ പ്രജനനം നടത്തി വളര്‍ത്തിയ മത്സ്യങ്ങളുടെ പ്രായവും ലാബില്‍ പരിശോധിക്കുകയുണ്ടായി. ആ മീനുകളുടെ കൃത്യമായ പ്രായം ചെവിക്കല്ലിലെ വളയം പരിശോധിച്ചുള്ള പ്രായനിര്‍ണയ പഠനത്തിലും ശരിയാണെന്ന് തിരിച്ചറിഞ്ഞു. മോത, വളവോടി തുടങ്ങിയ മത്സ്യങ്ങളാണ് ഇങ്ങനെ പരിശോധിച്ചത്.

പ്രായനിര്‍ണയ പഠനത്തിലൂടെ മീനുകളുടെ ജനനദിവസം വരെ കൃത്യമായി കണ്ടെത്താമെന്ന് പ്രിന്‍സിപ്പല്‍ സയന്റിസ്റ്റ് ഡോ ഇ എം അബ്ദുസ്സമദ് പറയുന്നു. മീനുകള്‍ക്ക് എത്ര ദിവസത്തെ പ്രായമുണ്ടെന്ന് വരെ കൃത്യമായി പറയാന്‍ ഈ പഠനത്തിലൂടെ സാധിക്കും. ഒരു ഇനം മത്സ്യത്തിന്റെ വ്യത്യസ്ത വലിപ്പത്തിലുള്ള പ്രായം നിജപ്പെടുത്തി അതേ ഇനത്തില്‍ പെട്ട മറ്റ് മത്സ്യങ്ങളുടെയും ശരാശരി പ്രായം കണ്ടെത്തുമെന്നും അദ്ദേഹം ഡോ സമദ് വിശദീകരിക്കുന്നു. 20 വര്‍ഷം വരെ ആയുസ്സുള്ള മീനാണ് മഞ്ഞക്കേര. ആറ് വര്‍ഷം പ്രായമുള്ള കേരയെ സിഎംഎഫ്ആര്‍ഐ ലാബില്‍ പരിശോധിച്ചിട്ടുണ്ട്. 162 സെ.മീ നീളമുണ്ടായിരുന്നു ഈ മത്സ്യത്തിന്. ഇതുവരെയുള്ള പരിശോധനയില്‍ മീനുകളിലെ പെണ്‍വര്‍ഗ്ഗത്തിന് ആണ്‍വര്‍ഗ്ഗത്തേക്കാള്‍ വളര്‍ച്ചാനിരക്ക് കണ്ടെത്താനായിട്ടുണ്ടെന്ന് അദ്ദേഹം പറഞ്ഞു. മത്തി, അയല, ചൂര, ചൈന്‍ വറ്റ എന്നീ മത്സ്യങ്ങളുടെ പ്രായനിര്‍ണയ പഠനം അവസാദനദശയിലാണ്.

കൂന്തലിന്റെ പ്രായം പെട്ടെന്നറിയാം
കൂന്തല്‍ വിഭാഗങ്ങളുടെ പ്രായം കണ്ടെത്തുന്നത്് മൊളസ്‌കന്‍ ഫിഷറീസ് വിഭാഗത്തിന് കീഴിലുള്ള പരീക്ഷണശാലയിലാണ്. മീനുകളില്‍ നിന്ന് വ്യത്യസ്തമായി വളരെ ചെറിയ ചെവിക്കല്ലാണ് (സ്റ്റാറ്റോലിത്ത്) ഇവയ്ക്കുള്ളത്. കൂടുതല്‍ ഉപകരണങ്ങളുടെ സഹായമില്ലാതെ തന്നെ ഇവയുടെ പ്രായം കണ്ടെത്താനാവുമെന്ന് മൊളസ്‌കന്‍ ഫിഷറീസ് വിഭാഗം മേധാവി ഡോ കെ സുനില്‍ മുഹമ്മദ് പറയുന്നു. 2 മുതല്‍ 3 വര്‍ഷം വരെയാണ് കൂന്തലിന്റെ ആയുസ്സ് എന്നായിരുന്നു ധാരണ. എന്നാല്‍ ഇവിടെ കണ്ട് വരുന്ന കൂന്തലുകള്‍ക്ക് ഒരു വര്‍ഷം വരെ മാത്രമാണ് ആയുസ്സുള്ളത്. ചില ചെറിയ ഇനം കൂന്തലുകള്‍ 4-6 മാസം മാത്രമാണ് ജീവിക്കുക. നാല് മാസം പ്രായമാകുമ്പോഴേക്കും കൂന്തല്‍ പ്രജനനത്തിന് തയ്യാറാകും.

ഒരു ദിവസം ശരാശരി 1.25 മില്ലിമീറ്റര്‍ ആണ് കൂന്തലിന്റെ വളര്‍ച്ചാനിരക്ക്. പക്ഷെ, കാലാവസ്ഥാവ്യതിയാനം, ഭക്ഷണ ലഭ്യത എന്നിവയ്ക്ക് അനുസൃതമായി ഇത് വ്യത്യാസപ്പെട്ടിരിക്കുമെന്ന് സിഎംഎഫ്ആര്‍ഐയിലെ വിദഗ്ധര്‍ ചൂണ്ടിക്കാട്ടുന്നു. ആണ്‍കൂന്തലുകള്‍ക്ക് പെണ്‍കൂന്തലുകളേക്കാള്‍ വളര്‍ച്ചാ നിരക്ക് കൂടുതലാണ്. ചെറുകൂന്തലുകള്‍ക്ക് മുതിര്‍ന്നതിനേക്കാള്‍ താരതമ്യേന വളര്‍ച്ചാനിരക്ക് കൂടുതലാണ്. അപൂര്‍വമായി മാത്രം കാണുന്ന ആഴക്കടല്‍ കൂന്തലുകളുടെയും അവയുടെ ലാര്‍വെയുടെയും പ്രായം നിര്‍ണയിക്കുന്ന പഠനപ്രവര്‍ത്തനങ്ങളും സിഎംഎഫ്ആര്‍ഐയില്‍ നടന്നുവരുന്നുണ്ട്. മൊളസ്‌കന്‍ ഫിഷറീസ് ഡിവിഷനിലെ സജികുമാര്‍ കെ കെ യാണ് അറബിക്കടലിലെ കൂന്തലുകളുടെ പ്രായനിര്‍ണയവുമായി ബന്ധപ്പെട്ട് പഠനം നടത്തുന്നത്.

മീനുകളുടെ വയസ്സ് അറിഞ്ഞിട്ടെന്ത് കാര്യം
മീനുകളുടെ പ്രായം അറിഞ്ഞിട്ടെന്ത് കാര്യം എന്ന് ആരും സംശയിച്ചു പോകും. എന്നാല്‍, മത്സ്യ സമ്പത്തിന്റെ സുസ്ഥിര പരിപാലനത്തിന് ഇത് വളരെ സഹായകരമാകുമെന്നാണ് സിഎംഎഫ്ആര്‍ഐ ശാസ്ത്രജ്ഞര്‍ പറയുന്നത്. ഓരോ സ്ഥലങ്ങളിലും സമയങ്ങളിലും പിടിക്കുന്ന മത്സ്യങ്ങള്‍ ഏത് പ്രായത്തിലുള്ളവയാണെന്ന് മനസ്സിലാക്കാന്‍ കഴിയുന്നത് അവയുടെ വിഭവമൂല്യനിര്‍ണയത്തിന് (സ്റ്റോക്ക് അസസ്മെന്റ്) വളരെ ഗുണം ചെയ്യും. സമുദ്രമത്സ്യ സമ്പത്തിന്റെ സംരക്ഷണവുമായി ബന്ധപ്പെട്ട് സിഎംഎഫ്ആര്‍ഐ സ്ഥിരമായി നടത്തിവരുന്ന മത്സ്യവിഭവ മൂല്യനിര്‍ണയ പ്രകിയയില്‍ മീനുകളുടെ കൃത്യമായ പ്രായം അറിയുന്നത് ഏറെ പ്രയോജനപ്പെടും. വലിപ്പം നോക്കി മീനുകളുടെ ഏകദേശ വളര്‍ച്ചാ നിരക്ക് മനസ്സിലാക്കുന്ന നിലവിലുള്ള രീതിയില്‍ മാറ്റം വരും. മീനുകളുടെ വളര്‍ച്ച, ആയുസ്സ് എന്നിവ കൃത്യമായി നസ്സിലാക്കാന്‍ പ്രായ നിര്‍ണയം സഹായിക്കും. വലിപ്പം നോക്കി പിടിക്കുന്നതിന് പകരം പ്രായം കൂടി കണക്കിലെടുത്ത് മത്സ്യബന്ധനം അവലംബിച്ചാല്‍ മാത്രമേ മത്സ്യസമ്പത്തിന് കോട്ടം തട്ടാതെ നിലനിര്‍ത്താനാകൂ.

സുസ്ഥിര പരിപാലനം വേണം
വാണിജ്യപ്രാധാന്യമുള്ള 800 ഓളം മത്സ്യയിനങ്ങളാണ് ഓരോ വര്‍ഷവും ഇന്ത്യയില്‍ പിടിക്കപ്പെടുന്നത്. മീനുകളുടെ വലിപ്പത്തിനനുസരിച്ച് വ്യത്യസ്ത മത്സ്യയിനിങ്ങള്‍ മത്സ്യബന്ധന വലകളില്‍ അകപ്പെടും. എന്നാല്‍, മത്സ്യയിനങ്ങളുടെ വ്യത്യാസമനുസരിച്ച് ഒരേ പ്രായത്തിലുള്ള മത്സ്യയിനങ്ങള്‍ തന്നെ വ്യത്യസ്ത വലിപ്പത്തിലുള്ളതാകും. ഉയര്‍ന്ന വളര്‍ച്ചാനിരക്കുള്ള മീനുകള്‍ ചെറിയ പ്രായത്തില്‍ തന്നെ പിടിക്കപ്പെടാന്‍ ഇത് വഴിവെക്കും. മീനുകളുടെ വലിപ്പം നോക്കിയുള്ള പരിപാലന രീതികള്‍ അത് കൊണ്ട് തന്നെ അശാസ്ത്രീയമാണ്. വ്യത്യസ്ത മത്സ്യയിനങ്ങളുടെ ഓരോ വലിപ്പത്തിലുമുള്ള പ്രായനിര്‍ണയം പൂര്‍ത്തിയാക്കുന്നതോടെ മത്സ്യപരിപാലന രീതി ഏറെ പ്രയോജനപ്രദവും സുഖകരവുമാകും. ഓരോ മീനും പിടിക്കപ്പെടേണ്ട പ്രായം തിട്ടപ്പെടുത്തിയാല്‍ മാത്രമേ മത്സ്യസമ്പത്തിന്റെ സുസ്ഥിരമായ വിനിയോഗം പ്രായോഗികമായി നടപ്പിലാക്കാനാകൂ. വലിപ്പത്തേക്കാള്‍, മീനുകളുടെ പ്രായം നോക്കിയുള്ള വിഭവമൂല്യനിര്‍ണയം കൂടുതല്‍ കാര്യക്ഷമമാകും. ചുരുക്കത്തില്‍ മത്സ്യസമ്പത്ത് സംരക്ഷിക്കുന്നതിന് മീനുകളുടെ പ്രായനിര്‍ണയം ഒരു പ്രധാന വഴിത്തിരിവാകുമെന്നാണ് സിഎംഎഫ്ആര്‍ഐ കണക്കുകൂട്ടുന്നത്.

മത്തിയുടെ വളര്‍ച്ചാ മുരടിപ്പ്
കഴിഞ്ഞ കുറച്ചു വര്‍ഷങ്ങളായി കടലില്‍ നിന്നുള്ള മത്സ്യലഭ്യത കുറഞ്ഞുവരുന്നതായാണ് സിഎംഎഫ്ആര്‍ഐ കണക്കുകള്‍ സൂചിപ്പിക്കുന്നത്. 2012ലാണ് ഇന്ത്യയില്‍ ഏറ്റവും കൂടുതല്‍ മത്സ്യം കടലില്‍ നിന്ന് പിടിക്കപ്പെട്ടത്. അതിന് ശേഷമുള്ള ഓരോ വര്‍ഷവും മത്സ്യലഭ്യത കുറഞ്ഞുവരുന്നതായാണ് സിഎംഎഫ്ആര്‍ഐ നടത്തിയ പഠനത്തില്‍ ബോധ്യപ്പെട്ടിട്ടുള്ളത്. മത്തിയുടെ ലഭ്യതയിലുണ്ടായ വന്‍ ഇടിവാണ് ഇതിന് വഴിവെച്ചത്. 2015 ലാണ് മത്തി അപകടകരമാം വിധത്തില്‍ കുറഞ്ഞത്. ഈ സമയത്ത് ലഭിച്ച മത്തിയെ സിഎംഎഫ്ആര്‍ഐയുടെ പ്രായപരിശോധന ലാബില്‍ പരിശോധിച്ചപ്പോള്‍ വളര്‍ച്ച മുരടിപ്പ് സംഭവിച്ചതായി കണ്ടെത്തിയെന്ന് ഡോ അബ്ദുസ്സമ്മദ് പറഞ്ഞു. അവയുടെ ചെവിക്കല്ല് പരിശോധിച്ചപ്പോഴാണ് ഇത് തിരിച്ചറിഞ്ഞത്. ഇക്കാലയളവില്‍ മത്തി മുട്ടയിടാത്തതായും പെലാജിക് ഫിഷറീസ് വിഭാഗത്തിന്റെ പഠനത്തില്‍ വ്യക്തമായിട്ടുണ്ടെന്നും അദ്ദേഹം പറഞ്ഞു. കാലാവസ്ഥ അനുകൂലമല്ലാത്തതാകും ഇതിന് കാരണമെന്നാണ് അനുമാനം.

പ്രായപൂര്‍ത്തി എത്താത്ത മീനുകളെ വന്‍തോതില്‍ പിടിക്കുന്നതും മത്സ്യലഭ്യത കുറഞ്ഞുവരുന്നതിന്റെ ഒരു പ്രധാന കാരണമാണ്. മീനുകള്‍ പ്രായപൂര്‍ത്തിയെത്തുന്ന കാലയളവും മുട്ടയിടുന്ന പ്രായവും കൃത്യമായി മനസ്സിലാക്കാന്‍ പറ്റിയാല്‍ മത്സ്യബന്ധനത്തില്‍ പുതിയ നിയന്ത്രണങ്ങള്‍ കൊണ്ട് വരാന്‍ സാധിക്കും. എല്ലാ മീനുകളുടെയും പ്രായനിര്‍ണയം പൂര്‍ണമായാല്‍ നിലവിലുള്ള മിനിമം ലീഗല്‍ സൈസിലും (പിടിക്കേണ്ട പരമാവധി കുറഞ്ഞ വലിപ്പം) മാറ്റങ്ങള്‍ വന്നേക്കാമെന്നാണ് കരുതുന്നത്.